I forrige veke var vi samla i Alta igjen. Overordna tema for samlinga var maling og animasjon (kjem som eiget innlegg). Vi hadde fargelære og gjorde fargeøvingar, vi lærte om ulike malemedie og fekk ein rask gjennomgang av kunsthistoriske periodar.
ITTEN SIN FARGESIRKEL
Ei øving innan fargelære var å blande fargane (sekundær- og tertiærfargane) i Itten sin fargesirkel ut av primærfargene (raud, gul og blå). Vi brukte temperamaling, men hadde ikkje heilt reine fargar. Derfor ser den oransje meir raud ut enn den raude, og den raude ser meir rosa ut enn raud. Likevel var det ei god øving i fargeblanding, og ei god førebuing på neste øving - mal meg bort.
MAL MEG BORT
Læraren vår hadde klipt ut mange småbitar av eit større bilde. Vi fikk utdelt ein slik bit/utsnitt kvar. Vi skulle lime den biten på eit maleark, og målet var å blande fargar og male rundt lappen for å skape eit heilskapeleg maleri. Vi skulle rett og slett male bort lappen, uten å male over han. Dette var ei god øving i malingsblanding, og noko som enkelt kan la seg gjere også av elevar på mellomtrinnet.
Alle hadde fått kvar sin lapp frå det same bildet. Likevel vart maleria våre ganske ulik. Det er vanskeleg å sjå kor lappane er limt på.
AKRYLMALING PÅ LERRET
Til den siste maleøvinga fekk vi utdelt kvart vårt lerret. Vi skulle male abstrakt med akrylfargar, og med, det eg vil kalle, utradisjonelle malereiskapar. Penslar vart dermed ikkje brukt. Eg brukte heller både kort, skrape, tannpirkarar, bomullspinnar, svamprulle og krølla papir. For meg var dette ein ny måte å male på, og også mykje artigare enn med pensel.
Eg blanda saman farger ut frå ein treklang i Itten sin fargesirkel.
Maleriet skal ikkje forestille noko som helst. Likevel er det mogleg for det oppmerksomme auget å sjå eit ansikt i det lyse feltet oppe til venstre.
Å male med andre reiskap enn pensel kan vere morosamt for elevar i skolen. Sjølv kan eg ikkje hugse å ha mala med anna enn pensel tidlegare.
Kommentarer
Legg inn en kommentar